САЙЁР ҚАБУЛЛАРНИНГ АМАЛИЙ САМАРАСИ

09 июль 2019

Президентимиз ташаббуси асосида судлар томонидан халқнинг ишончини қозониш, одамларни қийнаётган муаммоларини чуқур ўрганиб жойидан ҳал этиш мақсадида ўтказилаётган сайёр суд мажлислари ва аҳоли билан очиқ мулоқотлар амалда кутилган натижаларни бермоқда. Шунингдек, бу тадбирлар аҳолининг ҳуқуқий маданияти ва саводхонлигини ошириш, амалдаги қонунлар мазмун-моҳиятидан хабардор қилишда ҳам муҳим омил бўлмоқда.

 

sajeredgorov01.png

Олий суд раҳбарияти томонидан вилоятларда мунтазам равишда ўтказиб келинаётган сайёр суд мажлислари ва аҳоли очиқ мулоқотларда фуқароларнинг кўплаб муаммолари қонуний ечимини топмоқда.

2019 йил 6-7 июль кунлари Олий суд раиси ўринбосари Х. Ёдгоров ва Олий суд судьялари, вилоят суди раисилари томонидан Сурхондарё вилоятининг Қумқўрғон тумани ва Термиз шаҳар халқ қабулхоналарида халқ билан очиқ мулоқот ва сайёр қабуллар ўтказилди. Сайёр қабулда 108 нафар фуқаронинг мурожаати тингланди. 

Шундан 23 нафар фуқаронинг шикоят аризаси назорат тартибида ўрганиш, 7 нафар фуқаронинг аризаси эса, вилоят ва туманлараро судларида кўриб чиқиш учун қабул қилиб олинди. 38 нафар фуқарога мурожаати юзасидан қонуний тушунтириш берилди. 40 нафар фуқаронинг муаммоси жойида ҳал қилинди: 6 нафар (1 аёл ва 5 эркак) жазони ўташ муассасидан озод қилиниб, оиласига қайтарилди. 34 нафар шахс аҳлоқ тузатиш иши, озодликдан чеклаш каби жазони ўташдан шартли равишда озод қилинди.  

Бундан ташқари сайёр қабуллар жараёнида вилоят Хотин-қизлар қўмитаси, “Оила” маркази ходимлари билан ҳамкорликда нотинч оилалар аъзолари иштирокида очиқ мулоқот ўтказилди. Очиқ мулоқотда оиланинг муқаддаслиги, фарзанд тарбиясида тутган ўрни ҳақида батафсил тушунтириш берилди ва “Фарзанд омонат” ва “Ота” номли видеофильмлар намойиш этилди. Натижада 6 та низоли оила тикланди. 

Шунингдек, мурожаатчиларнинг алимент ундириш, болалар тарбияси ва уй-жой  билан боғлиқ муаммолари ҳал этилди.

 
Ўзбекистон Республикаси
Олий суди матбуот хизмати